har dil mein bughz zehn mein shar dekhte rahe

har dil meñ buġhz zehn meñ shar dekhte rahe

kis darja gir chukā hai bashar dekhte rahe

manzil kabhī qarīb kabhī duur ho ga.ī

ham to faqat tilism-e-safar dekhte rahe

mazlūmiyat ke sāmne zālim the sar-nigūñ

nezoñ pe jo buland the sar dekhte rahe

kis tarh āftāb pe Dāleñ naqāb ham

TuuTe hue makāñ kī kagar dekhte rahe

mahfil meñ ham ko chhoḌ ke fankār the sabhī

ham ḳhud-satā.ishī ke hunar dekhte rahe

phir kārvān-e-shauq guzartā chalā gayā

phir ham ġhubār-e-rāh-e-safar dekhte rahe

'satvat' ḳhushī kī ek kalī bhī na khil sakī

bas ḳhvāhishoñ ke zard shajar dekhte rahe

har dil mein bughz zehn mein shar dekhte rahe

kis darja gir chuka hai bashar dekhte rahe

manzil kabhi qarib kabhi dur ho gai

hum to faqat tilism-e-safar dekhte rahe

mazlumiyat ke samne zalim the sar-nigun

nezon pe jo buland the sar dekhte rahe

kis tarh aaftab pe Dalen naqab hum

TuTe hue makan ki kagar dekhte rahe

mahfil mein hum ko chhoD ke fankar the sabhi

hum KHud-sataishi ke hunar dekhte rahe

phir karwan-e-shauq guzarta chala gaya

phir hum ghubar-e-rah-e-safar dekhte rahe

'satwat' KHushi ki ek kali bhi na khil saki

bas KHwahishon ke zard shajar dekhte rahe