har ek ruh mein ek gham chhupa lage hai mujhe

har ek ruuh meñ ik ġham chhupā lage hai mujhe

ye zindagī to koī bad-duā lage hai mujhe

jo āñsuoñ meñ kabhī raat bhiig jaatī hai

bahut qarīb vo āvāz-e-pā lage hai mujhe

maiñ so bhī jā.ūñ to kyā merī band āñkhoñ meñ

tamām raat koī jhāñktā lage hai mujhe

maiñ jab bhī us ke ḳhayāloñ meñ kho sā jaatā huuñ

vo ḳhud bhī baat kare to burā lage hai mujhe

dabā ke aa.ī hai siine meñ kaun sī aaheñ

kuchh aaj rañg tirā sāñvlā lage hai mujhe

ab ek aadh qadam kā hisāb kyā rakhiye

abhī talak to vahī fāsla lage hai mujhe

hikāyat-e-ġham-e-dil kuchh kashish to rakhtī hai

zamāna ġhaur se suntā huā lage hai mujhe

har ek ruh mein ek gham chhupa lage hai mujhe

ye zindagi to koi bad-dua lage hai mujhe

jo aansuon mein kabhi raat bhig jati hai

bahut qarib wo aawaz-e-pa lage hai mujhe

main so bhi jaun to kya meri band aankhon mein

tamam raat koi jhankta lage hai mujhe

main jab bhi us ke KHayalon mein kho sa jata hun

wo KHud bhi baat kare to bura lage hai mujhe

daba ke aai hai sine mein kaun si aahen

kuchh aaj rang tera sanwla lage hai mujhe

ab ek aadh qadam ka hisab kya rakhiye

abhi talak to wahi fasla lage hai mujhe

hikayat-e-gham-e-dil kuchh kashish to rakhti hai

zamana ghaur se sunta hua lage hai mujhe