har kasi ko kab bhala yun mustarad karta hun main

har kasī ko kab bhalā yuuñ mustarad kartā huuñ maiñ

tū hai ḳhush-qismat agar tujh se hasad kartā huuñ maiñ

buġhz bhī siine meñ rakhtā huuñ amānat kī tarah

nafrateñ karne pe aa jā.ūñ to had kartā huuñ maiñ

koī apne-āp ko manvāne vaalā bhī to ho

mānñe meñ kab kasī ke radd-o-kad kartā huuñ maiñ

kuchh shu.ūrī satah par kuchh lā-shu'ūrī taur par

kār-e-fikr-o-fan meñ ab sab kī madad kartā huuñ maiñ

is liye mujh se ḳhafā haiñ ahl-e-gulshan āj-kal

rañg jhuTlātā huuñ ḳhushbū mustarad kartā huuñ maiñ

mere jazboñ se bachāo nek-dil logo mujhe

roz o shab in bad-ma.āshoñ kī madad kartā huuñ maiñ

dūsroñ ke vāste likkhā huā lagtā hai jhuuT

apnī sachchā.ī ko aksar aap rad kartā huuñ maiñ

rañg par aa.ī huī hai ab junūñ-ḳhezī merī

roz o shab tauhīn-e-arbāb-e-ḳhirad kartā huuñ maiñ

tauq gardan meñ pahantā huuñ lahū kī dhaar kā

ḳhalq ko hairān 'sājid' zad-ba-zad kartā huuñ maiñ

har kasi ko kab bhala yun mustarad karta hun main

tu hai KHush-qismat agar tujh se hasad karta hun main

bughz bhi sine mein rakhta hun amanat ki tarah

nafraten karne pe aa jaun to had karta hun main

koi apne-ap ko manwane wala bhi to ho

manne mein kab kasi ke radd-o-kad karta hun main

kuchh shuuri satah par kuchh la-shu'uri taur par

kar-e-fikr-o-fan mein ab sab ki madad karta hun main

is liye mujh se KHafa hain ahl-e-gulshan aaj-kal

rang jhuTlata hun KHushbu mustarad karta hun main

mere jazbon se bachao nek-dil logo mujhe

roz o shab in bad-maashon ki madad karta hun main

dusron ke waste likkha hua lagta hai jhuT

apni sachchai ko aksar aap rad karta hun main

rang par aai hui hai ab junun-KHezi meri

roz o shab tauhin-e-arbab-e-KHirad karta hun main

tauq gardan mein pahanta hun lahu ki dhaar ka

KHalq ko hairan 'sajid' zad-ba-zad karta hun main