ہر لمحہ حالات بدلتے دیکھے ہیں

ہر لمحہ حالات بدلتے دیکھے ہیں

ہم نے چڑھتے سورج ڈھلتے دیکھے ہیں

انسانوں کو پتھر بنتے دیکھا ہے

پتھر جیسے جسم پگھلتے دیکھے ہیں

پیاس بھٹکتی دیکھی ہے صحراؤں میں

اور پانی پر سائے چلتے دیکھے ہیں

اب تک ہیں محروم وہی تعبیروں سے

جن آنکھوں میں خواب مچلتے دیکھے ہیں

کیا بہلے گا اب وہ جھوٹے وعدوں سے

جن کے سچے وعدے ٹلتے دیکھے ہیں

مجبوری کی بوسیدہ دیواروں سے

لاچاری کے سانپ نکلتے دیکھے ہیں

لوگوں نے بس دل دیکھا ہے سالمؔ کا

کس نے دل میں زخم پگھلتے دیکھے ہیں