har moD par fareb hi khana paDa mujhe

har moḌ par fareb hī khānā paḌā mujhe

sach bolne kā bojh uThānā paḌā mujhe

qissa tumhārī yaad kā jab bhī chhiḌā kahīñ

mahfil se uTh ke duur hī jaanā paḌā mujhe

vo ḳhvāb jis kī koī bhī tā'bīr hī na thī

bojh us kā 'umr bhar hī uThānā paḌā mujhe

ik naam thā jo dil kī lakīroñ meñ qaid thā

apne hī hāthoñ us ko miTānā paḌā mujhe

kuchh aise bhī maqām mile rāh-e-'ishq meñ

patthar kī tarh ḳhud ko banānā paḌā mujhe

pūchhā kisī ne hañs ke jo barbādī kā sabab

apnā hī naam sab ko batānā paḌā mujhe

maiñ kāñch kā makān thā patthar ke shahr meñ

har zaḳhm apne dil meñ chhupānā paḌā mujhe

apne hī 'aks se mujhe vahshat sī ho ga.ī

ā.īna apne ghar se haTānā paḌā mujhe

'ādil' gunāh-gār thā sharminda ho gayā

sajdoñ meñ apne rab ko manānā paḌā mujhe

har moD par fareb hi khana paDa mujhe

sach bolne ka bojh uThana paDa mujhe

qissa tumhaari yaad ka jab bhi chhiDa kahin

mahfil se uTh ke dur hi jaana paDa mujhe

wo KHwab jis ki koi bhi ta'bir hi na thi

bojh us ka 'umr bhar hi uThana paDa mujhe

ek nam tha jo dil ki lakiron mein qaid tha

apne hi hathon us ko miTana paDa mujhe

kuchh aise bhi maqam mile rah-e-'ishq mein

patthar ki tarh KHud ko banana paDa mujhe

puchha kisi ne hans ke jo barbaadi ka sabab

apna hi nam sab ko batana paDa mujhe

main kanch ka makan tha patthar ke shahr mein

har zaKHm apne dil mein chhupana paDa mujhe

apne hi 'aks se mujhe wahshat si ho gai

aaina apne ghar se haTana paDa mujhe

'adil' gunah-gar tha sharminda ho gaya

sajdon mein apne rab ko manana paDa mujhe