har mulaqat mein lagte hain wo begane se

har mulāqāt meñ lagte haiñ vo begāne se

fā.eda kyā hai bhalā aisoñ ke yārāne se

kuchh jo samjhā to mujhe sab ne hī āshiq samjhā

baat ye ḳhuub nikālī mire afsāne se

zindagī apnī nazar aane lagī sirf sarāb

kabhī guzre jo dil-e-zār ke vīrāne se

ek pal bhī na Thahar pāoge ai sañg-zano

koī patthar kabhī lauT aayā jo dīvāne se

tum ko marnā hai to marnā mire gul hone par

sham.a kahtī rahī shab-bhar yahī parvāne se

phir na dekhā tujhe ai 'josh' sukūñ se baiThā

jab se uTThā hai tū is shoḳh ke kāshāne se

har mulaqat mein lagte hain wo begane se

faeda kya hai bhala aison ke yarane se

kuchh jo samjha to mujhe sab ne hi aashiq samjha

baat ye KHub nikali mere afsane se

zindagi apni nazar aane lagi sirf sarab

kabhi guzre jo dil-e-zar ke virane se

ek pal bhi na Thahar paoge ai sang-zano

koi patthar kabhi lauT aaya jo diwane se

tum ko marna hai to marna mere gul hone par

shama kahti rahi shab-bhar yahi parwane se

phir na dekha tujhe ai 'josh' sukun se baiTha

jab se uTTha hai tu is shoKH ke kashane se