hara-bhara tha kabhi jhaD sa badan mera

harā-bharā thā kabhī jhaaḌ sā badan merā

ki ā.inoñ meñ jhalaktā thā bāñkpan merā

charāġh le ke mujhe DhūñDne nikaltā thā

mire baġhair na rahtā thā ham-suḳhan merā

siyāhiyoñ ke bhañvar se nikal ke aayā huuñ

dhulā rahī hai ujāloñ se muñh kiran merā

siyāh phuul khilā dhuup kī muñDeroñ par

havā meñ Taañg diyā kis ne pairahan merā

maiñ reg-zār pe likkhī huī 'ibārat huuñ

havā chalegī to uḌ jā.egā badan merā

balā rahī hai mujhe barf se Dhakī choTī

paḌā huā hai chaTānoñ ke ghar kafan merā

shumār hone lage motiyoñ meñ kankar bhī

'ḳhalīl' kaam to aayā kisī ke fan merā

hara-bhara tha kabhi jhaD sa badan mera

ki aainon mein jhalakta tha bankpan mera

charagh le ke mujhe DhunDne nikalta tha

mere baghair na rahta tha ham-suKHan mera

siyahiyon ke bhanwar se nikal ke aaya hun

dhula rahi hai ujalon se munh kiran mera

siyah phul khila dhup ki munDeron par

hawa mein Tang diya kis ne pairahan mera

main reg-zar pe likkhi hui 'ibarat hun

hawa chalegi to uD jaega badan mera

bala rahi hai mujhe barf se Dhaki choTi

paDa hua hai chaTanon ke ghar kafan mera

shumar hone lage motiyon mein kankar bhi

'KHalil' kaam to aaya kisi ke fan mera