haram ka aaina barson se dhundla bhi hai hairan bhi

haram kā ā.īna barsoñ se dhuñdlā bhī hai hairāñ bhī

ik afsūn-e-barahman hai ki paidā bhī hai pinhāñ bhī

na jā ai nāḳhudā dariyā kī āhista-ḳhirāmī par

isī dariyā meñ ḳhvābīda hai mauj-e-tund jaulāñ bhī

kamāl-e-jāñ-nisārī ho ga.ī hai ḳhaak parvāna

use iksīr bhī kahte haiñ aur ḳhāk-e-pareshāñ bhī

vidā-e-shab bhī hai aur sham.a par ik bāñkpan bhī hai

hadīs-e-shauq bhī hai qissa-e-umr-e-gurezāñ bhī

na aa.ī yaad terī ye bhī mausam kā taġhayyur thā

ye kusht-e-shauq thī parvarda-hā-e-bād-o-bārāñ bhī

ye duniyā hai to kyā ai ham-nafas tafsīr-e-ġham kiije

vahī ādāb-e-mahfil bhī vahī ādāb-e-zindāñ bhī

shuā-e-mehr hai yā iltizām-e-zaḳhm-o-marham hai

ye dāġh-e-lāla bhī hai sho.la-e-la.al-e-badaḳhshāñ bhī

haram ka aaina barson se dhundla bhi hai hairan bhi

ek afsun-e-barahman hai ki paida bhi hai pinhan bhi

na ja ai naKHuda dariya ki aahista-KHirami par

isi dariya mein KHwabida hai mauj-e-tund jaulan bhi

kamal-e-jaan-nisari ho gai hai KHak parwana

use iksir bhi kahte hain aur KHak-e-pareshan bhi

wida-e-shab bhi hai aur shama par ek bankpan bhi hai

hadis-e-shauq bhi hai qissa-e-umr-e-gurezan bhi

na aai yaad teri ye bhi mausam ka taghayyur tha

ye kusht-e-shauq thi parwarda-ha-e-baad-o-baran bhi

ye duniya hai to kya ai ham-nafas tafsir-e-gham kije

wahi aadab-e-mahfil bhi wahi aadab-e-zindan bhi

shua-e-mehr hai ya iltizam-e-zaKHm-o-marham hai

ye dagh-e-lala bhi hai shola-e-lal-e-badaKHshan bhi