hasin teri tarah meri zindagi na rahi

hasīn terī tarah merī zindagī na rahī

tire baġhair kisī shai meñ dilkashī na rahī

ab is añdhere kā anjām dekhiye kyā ho

ki zindagī meñ mohabbat kī raushnī na rahī

tire hī ġham ko samajh luuñ na kyoñ matā'-e-hayāt

ḳhushī kā kyā hai bharosa rahī rahī na rahī

ḳhudā ke vāste tū hī batā bahār-e-chaman

ye baat kyā hai jo phūloñ meñ tāzgī na rahī

tirī nigāh-e-karam se thā e'tibār-e-hayāt

tire badalte hī bas jaise zindagī na rahī

vahī hai chāñd vahī āsmāñ vahī taare

magar jahāñ meñ vo pahlī sī raushnī na rahī

uThā jo parda-e-ruḳh ab to kyā uThā 'shādāñ'

nigāh-e-shauq meñ jab tāb-e-dīd hī na rahī

hasin teri tarah meri zindagi na rahi

tere baghair kisi shai mein dilkashi na rahi

ab is andhere ka anjam dekhiye kya ho

ki zindagi mein mohabbat ki raushni na rahi

tere hi gham ko samajh lun na kyon mata'-e-hayat

KHushi ka kya hai bharosa rahi rahi na rahi

KHuda ke waste tu hi bata bahaar-e-chaman

ye baat kya hai jo phulon mein tazgi na rahi

teri nigah-e-karam se tha e'tibar-e-hayat

tere badalte hi bas jaise zindagi na rahi

wahi hai chand wahi aasman wahi tare

magar jahan mein wo pahli si raushni na rahi

uTha jo parda-e-ruKH ab to kya uTha 'shadan'

nigah-e-shauq mein jab tab-e-did hi na rahi