haTe ye aa.ina mahfil se aur tū aa.e
koī to ho jo kabhī dil ke rū-ba-rū aa.e
mire lahū se agar ho ke surḳh-rū aa.e
malo to barg-e-hinā meñ vafā kī bū aa.e
vo āñsuoñ kī safā.ī se bad-gumāñ haiñ abas
dil-o-jigar meñ rahā kyā hai jo lahū aa.e
shab-e-visāl bhī tā-sub.h mutma.in na rahā
abhī thī raat ki paiġhām-e-ārzū aa.e
bayān-e-barq-e-tajallī chhuḌā hai ab sar-e-tūr
ajab nahīñ mire dil kī bhī guftugū aa.e
visāl-o-hijr meñ chhuptā hai dil kā haal kahīñ
bujhe to pyaas sivā ho jale to bū aa.e
jo mai ke dene meñ pīr-e-muġhāñ ko thā inkār
diloñ ko toḌne kyuuñ shīsha-o-subū aa.e
ajab hai utre dam-e-zabh un kī aañkh meñ ḳhuun
kaTīñ kahāñ kī rageñ aur kahāñ lahū aa.e
kiyā savāl to us dar se ye sadā aa.ī
use javāb hai jo le ke aarzū aa.e
jahān meñ haiñ subuk-bār kab shagufta-mizāj
chaman ke phuul liye bār-e-rañg-o-bū aa.e
mirī zabān ko kāñTā samajhtā hai sayyād
nikāl le ki na ye ho na guftugū aa.e
jhaTak rahī hai mirā ḳhuun apne dāman se
tumhārī teġh hai phir kyā vafā kī bū aa.e
madad de itnī taḌapne meñ inqilāb-e-jahāñ
jo mere dil meñ nihāñ hai vo rū-ba-rū aa.e
baḌhā baḌhā ke mirā dil lagā.iye talvār
jagah jafā kī sivā ho agar numū aa.e
haTe ye aaina mahfil se aur tu aae
koi to ho jo kabhi dil ke ru-ba-ru aae
mere lahu se agar ho ke surKH-ru aae
malo to barg-e-hina mein wafa ki bu aae
wo aansuon ki safai se bad-guman hain abas
dil-o-jigar mein raha kya hai jo lahu aae
shab-e-visal bhi ta-subh mutmain na raha
abhi thi raat ki paigham-e-arzu aae
bayan-e-barq-e-tajalli chhuDa hai ab sar-e-tur
ajab nahin mere dil ki bhi guftugu aae
visal-o-hijr mein chhupta hai dil ka haal kahin
bujhe to pyas siwa ho jale to bu aae
jo mai ke dene mein pir-e-mughan ko tha inkar
dilon ko toDne kyun shisha-o-subu aae
ajab hai utre dam-e-zabh un ki aankh mein KHun
kaTin kahan ki ragen aur kahan lahu aae
kiya sawal to us dar se ye sada aai
use jawab hai jo le ke aarzu aae
jahan mein hain subuk-bar kab shagufta-mizaj
chaman ke phul liye bar-e-rang-o-bu aae
meri zaban ko kanTa samajhta hai sayyaad
nikal le ki na ye ho na guftugu aae
jhaTak rahi hai mera KHun apne daman se
tumhaari tegh hai phir kya wafa ki bu aae
madad de itni taDapne mein inqilab-e-jahan
jo mere dil mein nihan hai wo ru-ba-ru aae
baDha baDha ke mera dil lagaiye talwar
jagah jafa ki siwa ho agar numu aae
Source:
Deewan-e-Saqib (Pg. 270)
-
Author:
Mirza Zakir Husain Qazlibaas Saqib Lucknowvi
-
- Edition: 1998
- Publisher: Urdu Acadami U.P.
- Year of Publication: 1998
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.