hatheliyon pe liye apne sar gae hain log

hatheliyoñ pe liye apne sar ga.e haiñ log

safar pe ab ki ba-rang-e-digar ga.e haiñ log

tire sitam kā gila yuuñ bhī kar ga.e haiñ log

ki aur kuchh na chalā bas to mar ga.e haiñ log

diloñ ke tiira gharoñ par tire jamāl kī dhuup

jo aa paḌī hai to kyā kyā sañvar ga.e haiñ log

huā hai yuuñ bhī ki apnī talab ke sahrā meñ

misāl-e-mauja-e-jū-e-safar ga.e haiñ log

baḌhī hai tishna-labī zindagī kī jab had se

to apnī zaat ke sāġhar meñ bhar ga.e haiñ log

diloñ meñ sūrateñ kyā kyā haiñ ḳhauf-e-pinhāñ kī

baḌhā hai apnā hī saaya to Dar ga.e haiñ log

uḌe haiñ rāh-guzāroñ meñ gard-e-jāñ ban ke

safar ke ishq meñ kyā kyā na kar ga.e haiñ log

ufuq gavāh rahe qatl-e-āftāb ke ba.ad

shafaq luTī hai to phir apne ghar ga.e haiñ log

ye sail-e-ḳhvāb thā yā ḳhvāb-e-sail thā kyā thā

ki chaḌh ke sūrat-e-dariyā utar ga.e haiñ log

ab un ke lauT na sakne kā ġham tujhe kyuuñ ho

ki sū-e-dār tire hukm par ga.e haiñ log

na koī saaya na aahaT ye hashr kaisā hai

kahāñ chhupī haiñ sadā.eñ kidhar ga.e haiñ log

sulag uThegā har ik dar havā ke chalte hī

qafas meñ sūrat-e-raqs-e-sharar ga.e haiñ log

maiñ ḳhud gayā to khulā saarā shahr qaid meñ thā

ḳhabar ye thī ki bahut muḳhtasar ga.e haiñ log

kahīñ pe kuchh to huā hai ki aaj zindāñ meñ

ga.e haiñ aur bahut be-ḳhatar ga.e haiñ log

tulū-e-mehr ko ab kaun rok saktā hai

gharoñ meñ ham-rah-e-najm-e-sahar ga.e haiñ log

hatheliyon pe liye apne sar gae hain log

safar pe ab ki ba-rang-e-digar gae hain log

tere sitam ka gila yun bhi kar gae hain log

ki aur kuchh na chala bas to mar gae hain log

dilon ke tera gharon par tere jamal ki dhup

jo aa paDi hai to kya kya sanwar gae hain log

hua hai yun bhi ki apni talab ke sahra mein

misal-e-mauja-e-ju-e-safar gae hain log

baDhi hai tishna-labi zindagi ki jab had se

to apni zat ke saghar mein bhar gae hain log

dilon mein suraten kya kya hain KHauf-e-pinhan ki

baDha hai apna hi saya to Dar gae hain log

uDe hain rah-guzaron mein gard-e-jaan ban ke

safar ke ishq mein kya kya na kar gae hain log

ufuq gawah rahe qatl-e-aftab ke baad

shafaq luTi hai to phir apne ghar gae hain log

ye sail-e-KHwab tha ya KHwab-e-sail tha kya tha

ki chaDh ke surat-e-dariya utar gae hain log

ab un ke lauT na sakne ka gham tujhe kyun ho

ki su-e-dar tere hukm par gae hain log

na koi saya na aahaT ye hashr kaisa hai

kahan chhupi hain sadaen kidhar gae hain log

sulag uThega har ek dar hawa ke chalte hi

qafas mein surat-e-raqs-e-sharar gae hain log

main KHud gaya to khula sara shahr qaid mein tha

KHabar ye thi ki bahut muKHtasar gae hain log

kahin pe kuchh to hua hai ki aaj zindan mein

gae hain aur bahut be-KHatar gae hain log

tulu-e-mehr ko ab kaun rok sakta hai

gharon mein ham-rah-e-najm-e-sahar gae hain log