hawa chali hai na patta koi hila ab tak

havā chalī hai na pattā koī hilā ab tak

vahī hai ek ḳhamoshī kā silsila ab tak

vo kaun log haiñ kis kī talāsh meñ gum haiñ

hameñ to apnā pata bhī nahīñ milā ab tak

tū apne chāhne vāloñ se āshnā na huī

yahī to tujh se hai ai ziist ik gilā ab tak

kisī kā dāman-e-sad-chāk kyā rafū karte

ki ham se apnā bhī dāman nahīñ silā ab tak

vahī safar vahī taare vahī thakan baaqī

vahī hai bujhte charāġhoñ kā silsila ab tak

purānī baat maiñ kal kī samajh ke bhuul gayā

magar hai zaḳhm tamannā-e-dil khulā ab tak

jise maiñ DhūñD rahā huuñ galī galī 'anjum'

vo shaḳhs mujh se bichhaḌ kar nahīñ milā ab tak

hawa chali hai na patta koi hila ab tak

wahi hai ek KHamoshi ka silsila ab tak

wo kaun log hain kis ki talash mein gum hain

hamein to apna pata bhi nahin mila ab tak

tu apne chahne walon se aashna na hui

yahi to tujh se hai ai zist ek gila ab tak

kisi ka daman-e-sad-chaak kya rafu karte

ki hum se apna bhi daman nahin sila ab tak

wahi safar wahi tare wahi thakan baqi

wahi hai bujhte charaghon ka silsila ab tak

purani baat main kal ki samajh ke bhul gaya

magar hai zaKHm tamanna-e-dil khula ab tak

jise main DhunD raha hun gali gali 'anjum'

wo shaKHs mujh se bichhaD kar nahin mila ab tak