hawa ki andhi panahon mein mat uchhaal mujhe

havā kī andhī panāhoñ meñ mat uchhāl mujhe

zamīñ hisār-e-kashish se na tū nikāl mujhe

sivā-e-rañj-e-nadāmat na kuchh milā tum ko

maiñ kah rahā thā banāo na tum misāl mujhe

shikast-e-dil ne ajab ġham ko sūrateñ dī haiñ

rafāqatoñ kī ghaḌī hai zarā sambhāl mujhe

maiñ ḳhvāb ḳhvāb jazīroñ kī sair ko niklūñ

uThā ke parda-e-shab hairatoñ meñ Daal mujhe

kabhī kabhī use dil se azīz-tar jaanā

ye sar jo dosh pe lagtā rahā vabāl mujhe

zamīn maiñ tirī chāhat meñ zer-e-dām aayā

asiir kar nahīñ paayā thā koī jaal mujhe

bayāz-e-vaqt pe us ne likhā hai naam mirā

yaqīn kar ki na hogā kabhī zavāl mujhe

suḳhan ke kuchh to guhar maiñ bhī nazr kartā chalūñ

ajab nahīñ ki kareñ yaad maah o saal mujhe

hawa ki andhi panahon mein mat uchhaal mujhe

zamin hisar-e-kashish se na tu nikal mujhe

siwa-e-ranj-e-nadamat na kuchh mila tum ko

main kah raha tha banao na tum misal mujhe

shikast-e-dil ne ajab gham ko suraten di hain

rafaqaton ki ghaDi hai zara sambhaal mujhe

main KHwab KHwab jaziron ki sair ko niklun

uTha ke parda-e-shab hairaton mein Dal mujhe

kabhi kabhi use dil se aziz-tar jaana

ye sar jo dosh pe lagta raha wabaal mujhe

zamin main teri chahat mein zer-e-dam aaya

asir kar nahin paya tha koi jal mujhe

bayaz-e-waqt pe us ne likha hai nam mera

yaqin kar ki na hoga kabhi zawal mujhe

suKHan ke kuchh to guhar main bhi nazr karta chalun

ajab nahin ki karen yaad mah o sal mujhe