hazaron gham hain is manzil mein manzil dekhne wale

hazāroñ ġham haiñ is manzil meñ manzil dekhne vaale

kaleja thaam le apnā mirā dil dekhne vaale

ye dil vāloñ ko ta.alīm-e-sujūd pā-e-jānāñ hai

sar-e-har-mauj ko barpā-e-sāhil dekhne vaale

har ik zarre meñ poshīda hai ik tuġhyān-e-mad.hoshi

sambhal kar dekhnā paimāna-e-dil dekhne vaale

miTātā jā rahā huuñ naqsh-e-pā sahrā-navardī meñ

kahāñ DhūñDeñge mujh ko merī manzil dekhne vaale

tere dil meñ hazāroñ mahfileñ jalvoñ kī pinhāñ haiñ

falak par anjum-e-tābāñ kī mahfil dekhne vaale

fishār-e-zabt se lailā kahīñ majnūñ na ho jaa.e

na dekh ab sū-e-mahmil sū-e-mahmil dekhne vaale

kisī kā aks huuñ 'ehsān' murā.āt-e-haqīqat meñ

mujhe samjheñge kyā tasvīr-e-bātil dekhne vaale

hazaron gham hain is manzil mein manzil dekhne wale

kaleja tham le apna mera dil dekhne wale

ye dil walon ko talim-e-sujud pa-e-jaanan hai

sar-e-har-mauj ko barpa-e-sahil dekhne wale

har ek zarre mein poshida hai ek tughyan-e-madhoshi

sambhal kar dekhna paimana-e-dil dekhne wale

miTata ja raha hun naqsh-e-pa sahra-nawardi mein

kahan DhunDenge mujh ko meri manzil dekhne wale

tere dil mein hazaron mahfilen jalwon ki pinhan hain

falak par anjum-e-taban ki mahfil dekhne wale

fishaar-e-zabt se laila kahin majnun na ho jae

na dekh ab su-e-mahmil su-e-mahmil dekhne wale

kisi ka aks hun 'ehsan' muraat-e-haqiqat mein

mujhe samjhenge kya taswir-e-baatil dekhne wale