hazimaten jo fana kar gain ghurur mera

hazīmateñ jo fanā kar ga.iiñ ġhurūr mirā

unhī ke dam se munavvar huā shu.ūr mirā

maiñ hairatī kisī mansūr kī talāsh meñ huuñ

kare jo aa ke ye ā.īna chuur chuur mirā

rivāj-e-zehn se maiñ iḳhtilāf rakhtā thā

sar-e-salīb mujhe le gayā futūr mirā

vo ajnabī hai magar ajnabī nahīñ lagtā

yahī ki us se koī rabt hai zarūr mirā

maiñ Duub kar bhī kisī daur meñ nahīñ Duubā

rahā hai matla-e-imkān meñ zuhūr mirā

use ab ahd-e-alam kī ināyateñ kahiye

ki zulmatoñ meñ ujāgar huā hai nuur mirā

maiñ us lihāz se be-nām nām-āvar huuñ

ki mere ba.ad huā zikr duur duur mirā

hazimaten jo fana kar gain ghurur mera

unhi ke dam se munawwar hua shuur mera

main hairati kisi mansur ki talash mein hun

kare jo aa ke ye aaina chur chur mera

riwaj-e-zehn se main iKHtilaf rakhta tha

sar-e-salib mujhe le gaya futur mera

wo ajnabi hai magar ajnabi nahin lagta

yahi ki us se koi rabt hai zarur mera

main Dub kar bhi kisi daur mein nahin Duba

raha hai matla-e-imkan mein zuhur mera

use ab ahd-e-alam ki inayaten kahiye

ki zulmaton mein ujagar hua hai nur mera

main us lihaz se be-nam nam-awar hun

ki mere baad hua zikr dur dur mera