hijr-e-jaanan se rihai ka qarina ho gaya

hijr-e-jānāñ se rihā.ī kā qarīna ho gayā

sahl marnā ho gayā dushvār jiinā ho gayā

jo parī-paikar nazar aaya vo hai zar kā mutī.a

har diram goyā sulaimāñ kā nagīna ho gayā

kyoñ na ho aisā urūj-e-nashsha-e-mai sāqiyā

tā falak mauj-e-havā kā kyā hī ziina ho gayā

vādī-e-dil hai tajallī-gāh-e-jānāñ rāt-din

in dinoñ siina hamārā tūr-e-sīnā ho gayā

saal bhar se mus.haf-e-rū-e-sanam dekhā nahīñ

vo rajab kyā is rajab kā bhī mahīna ho gayā

yaar kī shamshīr-e-abrū is qadar hai āb-dār

teġh par ḳhajlat se har jauhar pasīna ho gayā

kaun hai us maah kā jo garm-e-nazzāra nahīñ

chashma-e-ḳhurshīd bhī ab chashm-e-bīnā ho gayā

ḳhaak hai ab aab hī fasl-e-bahārī meñ sharāb

shīsha-e-sā.at bhī mah kā ābgīna ho gayā

gaḌ ga.e gulbun zamīñ meñ dekh kar baunā sā qad

thā kaf-e-gul meñ jo zar goyā dafīna ho gayā

jis tarah mādūm hote haiñ sitāre sub.h dam

ahd-e-pīrī meñ mirā ḳhālī ḳhazīna ho gayā

partav-e-jānāñ hai mere kālbud meñ jā-e-rūh

aa.ine kī pusht goyā apnā siina ho gayā

rang-e-pāñ se sabz sonā ban ga.e kundan se gaal

mubtazal tashbīh hai sone pe miinā ho gayā

furqat-e-sāqī meñ aise ban ga.e ham pārsā

mahv ḳhātir se ḳhayāl-e-jām-o-mīnā ho gayā

hai tasavvur meñ jo mahbūb-e-ilāhī rāt-din

ka.aba-e-dil saaf ai 'nāsiḳh' madīna ho gayā

hijr-e-jaanan se rihai ka qarina ho gaya

sahl marna ho gaya dushwar jina ho gaya

jo pari-paikar nazar aaya wo hai zar ka mutia

har diram goya sulaiman ka nagina ho gaya

kyon na ho aisa uruj-e-nashsha-e-mai saqiya

ta falak mauj-e-hawa ka kya hi zina ho gaya

wadi-e-dil hai tajalli-gah-e-jaanan raat-din

in dinon sina hamara tur-e-sina ho gaya

sal bhar se mushaf-e-ru-e-sanam dekha nahin

wo rajab kya is rajab ka bhi mahina ho gaya

yar ki shamshir-e-abru is qadar hai aab-dar

tegh par KHajlat se har jauhar pasina ho gaya

kaun hai us mah ka jo garm-e-nazzara nahin

chashma-e-KHurshid bhi ab chashm-e-bina ho gaya

KHak hai ab aab hi fasl-e-bahaari mein sharab

shisha-e-saat bhi mah ka aabgina ho gaya

gaD gae gulbun zamin mein dekh kar bauna sa qad

tha kaf-e-gul mein jo zar goya dafina ho gaya

jis tarah madum hote hain sitare subh dam

ahd-e-piri mein mera KHali KHazina ho gaya

partaw-e-jaanan hai mere kalbud mein ja-e-ruh

aaine ki pusht goya apna sina ho gaya

rang-e-pan se sabz sona ban gae kundan se gal

mubtazal tashbih hai sone pe mina ho gaya

furqat-e-saqi mein aise ban gae hum parsa

mahw KHatir se KHayal-e-jam-o-mina ho gaya

hai tasawwur mein jo mahbub-e-ilahi raat-din

kaba-e-dil saf ai 'nasiKH' madina ho gaya