hijr hai ab tha yahin mein zar hum pahlu-e-dost

hijr hai ab thā yahīñ meñ zaar ham pahlū-e-dost

mere bistar par mujhe taḌpā rahī hai bū-e-dost

ḳhatm zīnat ho ga.ī mashshāta ne le liiñ balā.eñ

gesu-e-pur-ḳham ne chūme shāna-o-bāzū-e-dost

imtihāñ quvvat kā hai talvār uThā.ī jaatī hai

ab to is qābil hue haiñ panja-o-bāzū-e-dost

zaḳhm khātā baḌh ke maiñ aur vo lagātā baḌh ke teġh

dil mirā baḌhtā to baḌhtī quvvat-e-bāzū-e-dost

ghaT gayā yaañ ḳhuun aur vaañ fasd kā sāmāñ huā

aa gayā ġhash mujh ko jab bāñdhā gayā bāzū-e-dost

jaan aadhī rah ga.ī dekhī jo ġhusse kī nazar

dil pe ik bijlī girī jab hil ga.e abrū-e-dost

mujh ko jin se ishq hai un ko hai mujh se dushmanī

yaañ vo aate the ki uljhe paañv gesū-e-dost

ka.aba jis ko log kahte haiñ makāñ hai yaar kā

arsh-e-a.azam naam rakhte haiñ zamīn-e-kū-e-dost

mere siine meñ huī kyuuñ ḳhāna-e-dil kī binā

ye makāñ banñe ke qābil thī zamīn-e-kū-e-dost

zaḳhmī-e-ulfat huuñ maiñ sehat nahīñ hogī mujhe

bhar rahī hai dil ke zaḳhmoñ meñ havā.e kū-e-dost

baḳhshtī hai ruuh ko har martaba ik tāzgī

mujh ko marne hī nahīñ detī havā-e-kū-e-dost

tālib-e-dīdār haiñ hai saaf āñkhoñ se ayaañ

go ki muñh se kuchh nahīñ kahte gadā-e-kū-e-dost

dushman iizā dete haiñ har martaba mujh ko 'rashīd'

ġhussa aatā hai magar maiñ dekhtā huuñ sū-e-dost

hijr hai ab tha yahin mein zar hum pahlu-e-dost

mere bistar par mujhe taDpa rahi hai bu-e-dost

KHatm zinat ho gai mashshata ne le lin balaen

gesu-e-pur-KHam ne chume shana-o-bazu-e-dost

imtihan quwwat ka hai talwar uThai jati hai

ab to is qabil hue hain panja-o-bazu-e-dost

zaKHm khata baDh ke main aur wo lagata baDh ke tegh

dil mera baDhta to baDhti quwwat-e-bazu-e-dost

ghaT gaya yan KHun aur wan fasd ka saman hua

aa gaya ghash mujh ko jab bandha gaya bazu-e-dost

jaan aadhi rah gai dekhi jo ghusse ki nazar

dil pe ek bijli giri jab hil gae abru-e-dost

mujh ko jin se ishq hai un ko hai mujh se dushmani

yan wo aate the ki uljhe panw gesu-e-dost

kaba jis ko log kahte hain makan hai yar ka

arsh-e-azam nam rakhte hain zamin-e-ku-e-dost

mere sine mein hui kyun KHana-e-dil ki bina

ye makan banne ke qabil thi zamin-e-ku-e-dost

zaKHmi-e-ulfat hun main sehat nahin hogi mujhe

bhar rahi hai dil ke zaKHmon mein hawae ku-e-dost

baKHshti hai ruh ko har martaba ek tazgi

mujh ko marne hi nahin deti hawa-e-ku-e-dost

talib-e-didar hain hai saf aankhon se ayan

go ki munh se kuchh nahin kahte gada-e-ku-e-dost

dushman iza dete hain har martaba mujh ko 'rashid'

ghussa aata hai magar main dekhta hun su-e-dost