ہجر کے بوجھ کو ڈھونا بھی نہیں آتا ہے

ہجر کے بوجھ کو ڈھونا بھی نہیں آتا ہے

اب مجھے پھوٹ کے رونا بھی نہیں آتا ہے

اک ستم یہ ہے تجھے بھول نہیں پاتے ہیں

اور کسی اور کا ہونا بھی نہیں آتا ہے

ان کے ہاتھوں سے ہی غربت نے کتابیں چھینی

جن کے ہاتھوں میں کھلونا بھی نہیں آتا ہے

پیار کے باغ میں نفرت کو اگاؤں کیسے

مجھ کو تو بیج یہ بونا بھی نہیں آتا ہے

سسکیاں سن کے مری رات پڑوسی نے کہا

کیا تجھے رات میں سونا بھی نہیں آتا ہے

اس کو مخمل کے بھی بستر سے شکایت ہے ملکؔ

میرے حصے میں بچھونا بھی نہیں آتا ہے