hijr mein gham ki chaDhai hai ilahi tauba

hijr meñ ġham kī chaḌhā.ī hai ilāhī tauba

kyā nasībe kī burā.ī hai ilāhī tauba

kitne kānoñ ke vo kachche haiñ ki allāh kī panāh

kyā raqīboñ kī ban aa.ī hai ilāhī tauba

naala ho aah ho fariyād ho yā zaarī ho

yaar tak sab kī rasā.ī hai ilāhī tauba

ho chukā qatl jahāñ teġh bhī uThne kī nahīñ

kis qadar narm kalā.ī hai ilāhī tauba

shaiḳh-sāhib bhī nahīñ bach ke yahāñ se nikle

kis qadar un ko pilā.ī hai ilāhī tauba

dil-lagī aap se kī ḳhalq meñ badnām hue

nek-nāmī ye kamā.ī hai ilāhī tauba

chaah kar tum ko bhalā aur ko kyūñkar chāhūñ

vaah kyā dil meñ samā.ī hai ilāhī tauba

le ga.e chhīn ke dil mail nahīñ chitvan par

kitnī diida meñ safā.ī hai ilāhī tauba

bosa māñgā to kahā shukr-e-ḳhudā achchhā huuñ

baat kyā jald uḌaa.ī hai ilāhī tauba

nahīñ ma.alūm ki kis shaḳhs kā muñh dekhā hai

aaj phir ġham kī chaḌhā.ī hai ilāhī tauba

kūcha-e-ishq kī sach pūchho to ham ne 'parvīñ'

kis qadar ḳhaak uḌaa.ī hai ilāhī tauba

hijr mein gham ki chaDhai hai ilahi tauba

kya nasibe ki burai hai ilahi tauba

kitne kanon ke wo kachche hain ki allah ki panah

kya raqibon ki ban aai hai ilahi tauba

nala ho aah ho fariyaad ho ya zari ho

yar tak sab ki rasai hai ilahi tauba

ho chuka qatl jahan tegh bhi uThne ki nahin

kis qadar narm kalai hai ilahi tauba

shaiKH-sahib bhi nahin bach ke yahan se nikle

kis qadar un ko pilai hai ilahi tauba

dil-lagi aap se ki KHalq mein badnam hue

nek-nami ye kamai hai ilahi tauba

chah kar tum ko bhala aur ko kyunkar chahun

wah kya dil mein samai hai ilahi tauba

le gae chhin ke dil mail nahin chitwan par

kitni dida mein safai hai ilahi tauba

bosa manga to kaha shukr-e-KHuda achchha hun

baat kya jald uDai hai ilahi tauba

nahin malum ki kis shaKHs ka munh dekha hai

aaj phir gham ki chaDhai hai ilahi tauba

kucha-e-ishq ki sach puchho to hum ne 'parwin'

kis qadar KHak uDai hai ilahi tauba