himmat-o-azm badal jurat-e-kirdar badal

himmat-o-azm badal jur.at-e-kirdār badal

ruḳh-e-daurāñ ko palaT vaqt kī raftār badal

ab to kahte ho vafā ham se karoge lekin

vaqt aane pe kahīñ jaa.e na sarkār badal

hashr se qabl kahīñ hashr na barpā ho jaa.e

dekh lillāh zarā shoḳhī-e-raftār badal

gar badaltā hai tujhe dahr kā farsūda nizām

tujh pe lāzim hai ki har baat kā me.aar badal

manzil-e-ishq nahīñ aql ke bas kī ai dost

hai agar sāhib-e-dil qāfila-sālār badal

terī rahmat pe jo hotā na bharosā un ko

ain mumkin hai ki jaate ye gunahgār badal

himmat-o-azm badal jurat-e-kirdar badal

ruKH-e-dauran ko palaT waqt ki raftar badal

ab to kahte ho wafa hum se karoge lekin

waqt aane pe kahin jae na sarkar badal

hashr se qabl kahin hashr na barpa ho jae

dekh lillah zara shoKHi-e-raftar badal

gar badalta hai tujhe dahr ka farsuda nizam

tujh pe lazim hai ki har baat ka mear badal

manzil-e-ishq nahin aql ke bas ki ai dost

hai agar sahib-e-dil qafila-salar badal

teri rahmat pe jo hota na bharosa un ko

ain mumkin hai ki jate ye gunahgar badal