hisar-e-chashm se bahar nahin mila koi

hisār-e-chashm se bāhar nahīñ milā koī

maiñ DhūñDhtā hī rahā par nahīñ milā koī

mire vajūd meñ ḳhushbū kahāñ se aa.egī

bahut dinoñ se gul-e-tar nahīñ milā koī

fasīl-e-jism se bāhar bhī jhāñk kar dekhā

mujhe to mere barābar nahīñ milā koī

pas-e-ġhubār bhī maiñ ā.ina-ba-dast rahā

magar nigāh ko manzar nahīñ milā koī

haiñ tere dast-e-tasarruf meñ anfus-o-āfāq

mujhe ḳhulūs kā paikar nahīñ milā koī

havā chalī to makāñ tīrgī meñ Duub ga.e

charāġh rāhguzar par nahīñ milā koī

ye ḳhud-sarī kā ajab daur hai ki 'aḳhtar' se

ġharīb-e-shahr samajh kar nahīñ milā koī

hisar-e-chashm se bahar nahin mila koi

main DhunDhta hi raha par nahin mila koi

mere wajud mein KHushbu kahan se aaegi

bahut dinon se gul-e-tar nahin mila koi

fasil-e-jism se bahar bhi jhank kar dekha

mujhe to mere barabar nahin mila koi

pas-e-ghubar bhi main aaina-ba-dast raha

magar nigah ko manzar nahin mila koi

hain tere dast-e-tasarruf mein anfus-o-afaq

mujhe KHulus ka paikar nahin mila koi

hawa chali to makan tirgi mein Dub gae

charagh rahguzar par nahin mila koi

ye KHud-sari ka ajab daur hai ki 'aKHtar' se

gharib-e-shahr samajh kar nahin mila koi