ho dil-lagi mein bhi dil ki lagi to achchha hai

ho dil-lagī meñ bhī dil kī lagī to achchhā hai

lagā ho kaam se gar aadmī to achchhā hai

añdherī shab meñ ġhanīmat hai apnī tābish-e-dil

hisār-e-jāñ meñ rahe raushnī to achchhā hai

shajar meñ ziist ke hai shāḳh-e-ġham samar-āvar

jo in rutoñ meñ phale shā.irī to achchhā hai

ye ham se Dūbte sūraj ke rañg kahte haiñ

zavāl meñ bhī ho kuchh dilkashī to achchhā hai

sazā zamīr kī chehra bigāḌ detī hai

ḳhud apnī juun meñ ho aadmī to achchhā hai

nahīñ jo lazzat-e-duniyā nashāt-e-ġham hī sahī

mile jo yak-do nafas sarḳhushī to achchhā hai

safar meñ ek se do hoñ to raah āsāñ ho

chale jo saath mire bekasī to achchhā hai

dayār-e-dil meñ mahakte haiñ phuul yādoñ ke

rache base jo abhī zindagī to achchhā hai

chalo jo kuchh nahīñ 'bāqar' matā-e-dard to hai

use sambhāl ke rakkho abhī to achchhā hai

ho dil-lagi mein bhi dil ki lagi to achchha hai

laga ho kaam se gar aadmi to achchha hai

andheri shab mein ghanimat hai apni tabish-e-dil

hisar-e-jaan mein rahe raushni to achchha hai

shajar mein zist ke hai shaKH-e-gham samar-awar

jo in ruton mein phale shairi to achchha hai

ye hum se Dubte suraj ke rang kahte hain

zawal mein bhi ho kuchh dilkashi to achchha hai

saza zamir ki chehra bigaD deti hai

KHud apni jun mein ho aadmi to achchha hai

nahin jo lazzat-e-duniya nashat-e-gham hi sahi

mile jo yak-do nafas sarKHushi to achchha hai

safar mein ek se do hon to rah aasan ho

chale jo sath mere bekasi to achchha hai

dayar-e-dil mein mahakte hain phul yaadon ke

rache base jo abhi zindagi to achchha hai

chalo jo kuchh nahin 'baqar' mata-e-dard to hai

use sambhaal ke rakkho abhi to achchha hai