hote hain KHush kisi ki sitam-raniyon se hum

hote haiñ ḳhush kisī kī sitam-rāniyoñ se ham

vaqf-e-balā haiñ apnī hī nādāniyoñ se ham

kis muñh se jā ke shikva-e-jaur-o-jafā kareñ

marte haiñ aur un kī pashemāniyoñ se ham

mīrās-e-dasht-o-koh meñ farhād o qais kī

ulfat ko pūchhte haiñ bayābāniyoñ se ham

ghar baiThe sair hotī hai arz-o-samā kī roz

mahv-e-safar haiñ tab.a kī jaulāniyoñ se ham

kyūñkar baġhair jalva-e-hairat tarāz-e-husn

paa.eñ najāt dil kī pareshāniyoñ se ham

ai bānī-e-jafā tirā ehsāñ hai is meñ kyā

jiite haiñ gar to apnī girāñ-jāniyoñ se ham

hote hain KHush kisi ki sitam-raniyon se hum

waqf-e-bala hain apni hi nadaniyon se hum

kis munh se ja ke shikwa-e-jaur-o-jafa karen

marte hain aur un ki pashemaniyon se hum

miras-e-dasht-o-koh mein farhad o qais ki

ulfat ko puchhte hain bayabaniyon se hum

ghar baiThe sair hoti hai arz-o-sama ki roz

mahw-e-safar hain taba ki jaulaniyon se hum

kyunkar baghair jalwa-e-hairat taraaz-e-husn

paen najat dil ki pareshaniyon se hum

ai bani-e-jafa tera ehsan hai is mein kya

jite hain gar to apni giran-jaaniyon se hum