husn-e-be-mehr ko parwa-e-tamanna kya ho

husn-e-be-mehr ko parvā-e-tamannā kyā ho

jab ho aisā to ilāj-e-dil-e-shaidā kyā ho

kasrat-e-husn kī ye shaan na dekhī na sunī

barq larzāñ hai koī garm-e-tamāshā kyā ho

be-misālī ke haiñ ye rang jo bā-vasf-e-hijāb

be-naqābī pe tirā jalva-e-yaktā kyā ho

dekheñ ham bhī jo tire husn-e-dil-ārā kī bahār

is meñ nuqsān tirā ai gul-e-rā'nā kyā ho

ham ġharaz-mand kahāñ martaba-e-ishq kahāñ

ham ko samjheñ vo havas-kār to bejā kyā ho

dil-farebī hai tirī bā.is-e-sad josh o ḳharosh

haal ye ho to dil-e-zār shakebā kyā ho

raat din rahne lagī us sitam-ījād kī yaad

'hasrat' ab dekhiye anjām hamārā kyā ho

husn-e-be-mehr ko parwa-e-tamanna kya ho

jab ho aisa to ilaj-e-dil-e-shaida kya ho

kasrat-e-husn ki ye shan na dekhi na suni

barq larzan hai koi garm-e-tamasha kya ho

be-misali ke hain ye rang jo ba-wasf-e-hijab

be-naqabi pe tera jalwa-e-yakta kya ho

dekhen hum bhi jo tere husn-e-dil-ara ki bahaar

is mein nuqsan tera ai gul-e-ra'na kya ho

hum gharaz-mand kahan martaba-e-ishq kahan

hum ko samjhen wo hawas-kar to beja kya ho

dil-farebi hai teri bais-e-sad josh o KHarosh

haal ye ho to dil-e-zar shakeba kya ho

raat din rahne lagi us sitam-ijad ki yaad

'hasrat' ab dekhiye anjam hamara kya ho