husn-e-pari ek jalwa-e-mastana hai us ka

husn-e-parī ik jalva-e-mastāna hai us kā

hushyār vahī hai ki jo dīvāna hai us kā

gul aate haiñ hastī meñ adam se hama-tan-gosh

bulbul kā ye naala nahīñ afsāna hai us kā

giryāñ hai agar sham.a to sar dhuntā hai shola

mālūm huā soḳhta-parvāna hai us kā

vo shoḳh nihāñ-ganj kī mānind hai us meñ

māmūra-e-ālam jo hai vīrāna hai us kā

jo chashm ki hairāñ huī ā.īna hai us kī

jo siina ki sad chaak huā shāna hai us kā

dil qasr-e-shahanshah hai vo shoḳh us meñ shahanshāh

arsa ye do aalam kā jilau ḳhāna hai us kā

vo yaad hai us kī ki bhulā de do jahāñ ko

hālat ko kare ġhair vo yārāna hai us kā

yūsuf nahīñ jo haath lage chand diram se

qīmat jo do aalam kī hai bai.āna hai us kā

āvārgi-e-nik.hat-e-gul hai ye ishāra

jaame se vo bāhar hai jo dīvāna hai us kā

ye haal huā us ke faqīroñ se huvaidā

ālūda-e-duniyā jo hai begāna hai us kā

shukrāna-e-sāqi-e-azal kartā hai 'ātish'

labrez mai-e-shauq se paimāna hai us kā

husn-e-pari ek jalwa-e-mastana hai us ka

hushyar wahi hai ki jo diwana hai us ka

gul aate hain hasti mein adam se hama-tan-gosh

bulbul ka ye nala nahin afsana hai us ka

giryan hai agar shama to sar dhunta hai shola

malum hua soKHta-parwana hai us ka

wo shoKH nihan-ganj ki manind hai us mein

mamura-e-alam jo hai virana hai us ka

jo chashm ki hairan hui aaina hai us ki

jo sina ki sad chaak hua shana hai us ka

dil qasr-e-shahanshah hai wo shoKH us mein shahanshah

arsa ye do aalam ka jilau KHana hai us ka

wo yaad hai us ki ki bhula de do jahan ko

haalat ko kare ghair wo yarana hai us ka

yusuf nahin jo hath lage chand diram se

qimat jo do aalam ki hai baiana hai us ka

aawargi-e-nikhat-e-gul hai ye ishaara

jame se wo bahar hai jo diwana hai us ka

ye haal hua us ke faqiron se huwaida

aaluda-e-duniya jo hai begana hai us ka

shukrana-e-saqi-e-azal karta hai 'atish'

labrez mai-e-shauq se paimana hai us ka