husn ko shaklen dikhani aa gain

husn ko shakleñ dikhānī aa ga.iiñ

shoḳhiyāñ le kar javānī aa ga.iiñ

sar meñ saudā dil meñ dard ā.ankhoñ meñ ashk

bastiyāñ ham ko basānī aa ga.iiñ

jo bigaḌ jaatā thā bātoñ par kabhī

ab use bāteñ banānī aa ga.iiñ

dil meñ lākhoñ daaġh raushan ho ga.e

ishq ko sham.eñ jalānī aa ga.iiñ

barq-o-bārāñ ke jilau meñ badliyāñ

saath le kar aag paanī aa ga.iiñ

ai dil-e-rāhat-talab hoshyār-bāsh

sā.ateñ ab imtihānī aa ga.iiñ

dil lagā kar phañs ga.e zahmat meñ ham

thiiñ balā.eñ jitnī aanī aa ga.iiñ

muskurā denā qayāmat ho gayā

bijliyāñ tum ko girānī aa ga.iiñ

Dar rahe the jin se arbāb-e-jahāñ

vo balā.eñ āsmānī aa ga.iiñ

'nūh' vo kahte haiñ phir tūfān uThe

quvvateñ ab āzmānī aa ga.iiñ

husn ko shaklen dikhani aa gain

shoKHiyan le kar jawani aa gain

sar mein sauda dil mein dard aaankhon mein ashk

bastiyan hum ko basani aa gain

jo bigaD jata tha baaton par kabhi

ab use baaten banani aa gain

dil mein lakhon dagh raushan ho gae

ishq ko shamen jalani aa gain

barq-o-baran ke jilau mein badliyan

sath le kar aag pani aa gain

ai dil-e-rahat-talab hoshyar-bash

saaten ab imtihani aa gain

dil laga kar phans gae zahmat mein hum

thin balaen jitni aani aa gain

muskura dena qayamat ho gaya

bijliyan tum ko girani aa gain

Dar rahe the jin se arbab-e-jahan

wo balaen aasmani aa gain

'nuh' wo kahte hain phir tufan uThe

quwwaten ab aazmani aa gain