ibrat-e-dahr ho gayā jab se chhupā mazār meñ
ḳhair jagah to mil ga.ī dīda-e-e'tibār meñ
toḌ rahā hai bāġhbāñ pañkhuḌiyāñ bahār meñ
koī to ho fidā-e-gul ek nahīñ mazār meñ
mahv huuñ yād-e-chehra-e-shāhid-e-gul-azār meñ
ab ye ḳhizāñ-nasīb dil jā ke milā bahār meñ
auj-e-nihād-e-tabā kī miT ke bhī shaan rah ga.ī
mar ke maiñ sū-e-asmāñ mil ke uḌā ġhubār meñ
mere libās-e-kohna se haTtī nahīñ hai un kī aañkh
shāyad ulajh ga.ī nazar jāma-e-tār-tār meñ
tum ne shab-e-firāq meñ dekhīñ nahīñ jo hālateñ
aaj vo aa ke dekh lo ālam-e-ehtizār meñ
jazb-e-shamīm-e-zulf hai dāna-e-dām se sivā
saikḌoñ dil khiñch aa.e haiñ gesu-e-mushk-bār meñ
faisla ho hī jā.egā chhañTne de bhiiḌ hashr kī
'sāqib'-e-dil-hazīñ hai aaj tū bhī kisī shumār meñ
ibrat-e-dahr ho gaya jab se chhupa mazar mein
KHair jagah to mil gai dida-e-e'tibar mein
toD raha hai baghban pankhuDiyan bahaar mein
koi to ho fida-e-gul ek nahin mazar mein
mahw hun yaad-e-chehra-e-shahid-e-gul-azar mein
ab ye KHizan-nasib dil ja ke mila bahaar mein
auj-e-nihad-e-taba ki miT ke bhi shan rah gai
mar ke main su-e-asman mil ke uDa ghubar mein
mere libas-e-kohna se haTti nahin hai un ki aankh
shayad ulajh gai nazar jama-e-tar-tar mein
tum ne shab-e-firaq mein dekhin nahin jo haalaten
aaj wo aa ke dekh lo aalam-e-ehtizar mein
jazb-e-shamim-e-zulf hai dana-e-dam se siwa
saikDon dil khinch aae hain gesu-e-mushk-bar mein
faisla ho hi jaega chhanTne de bhiD hashr ki
'saqib'-e-dil-hazin hai aaj tu bhi kisi shumar mein
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.