ek aah-e-zer-e-lab ke gunahgar ho gae

ik āh-e-zer-e-lab ke gunahgār ho ga.e

ab ham bhī dāḳhil-e-saf-e-aġhyār ho ga.e

jis dard ko samajhte the ham un kā faiz-e-ḳhās

us dard ke bhī laakh ḳharīdār ho ga.e

jin hausloñ se merā junūñ mutma.in na thā

vo hausle zamāne ke me.aar ho ga.e

har va.ada jaise harf-e-ġhalat thā sarāb thā

ham to nisār-e-jur.at-e-inkār ho ga.e

sarsabz pattiyoñ kā lahū chuus chuus kar

kitne hī phuul raunaq-e-gulzār ho ga.e

'zaidī' ne taaza sher sunā.e ba-rañg-e-ḳhās

ham bhī ḳhudā-e-shoḳhī-e-afkār ho ga.e

ek aah-e-zer-e-lab ke gunahgar ho gae

ab hum bhi daKHil-e-saf-e-aghyar ho gae

jis dard ko samajhte the hum un ka faiz-e-KHas

us dard ke bhi lakh KHaridar ho gae

jin hauslon se mera junun mutmain na tha

wo hausle zamane ke mear ho gae

har wada jaise harf-e-ghalat tha sarab tha

hum to nisar-e-jurat-e-inkar ho gae

sarsabz pattiyon ka lahu chus chus kar

kitne hi phul raunaq-e-gulzar ho gae

'zaidi' ne taza sher sunae ba-rang-e-KHas

hum bhi KHuda-e-shoKHi-e-afkar ho gae