ek aawara sa lamha kya qafas mein aa gaya hai

ik āvāra sā lamha kyā qafas meñ aa gayā hai

lagā jaise zamāna dastaras meñ aa gayā hai

ye kis koñpal khulī sā'at sadā dī hai kisī ne

rutoñ kā ras har ik tār-e-nafas meñ aa gayā hai

ham us kūche se nisbat kī ḳhushī kaise sañbhāleñ

hamārā naam us ke ḳhār-o-ḳhas meñ aa gayā hai

lahū meñ lau kahāñ maujūd zinda rābte kī

nibhāne ko faqat be-rūh rasmeñ aa gayā hai

anā ke faisle kyā marzi-e-pindār kaisī

mirā honā na honā us ke bas meñ aa gayā hai

utar aa.e un āñkhoñ meñ kuchh aise 'aks 'ālī'

ki dil phir se giraft-e-pesh-o-pas meñ aa gayā hai

ek aawara sa lamha kya qafas mein aa gaya hai

laga jaise zamana dastaras mein aa gaya hai

ye kis konpal khuli sa'at sada di hai kisi ne

ruton ka ras har ek tar-e-nafas mein aa gaya hai

hum us kuche se nisbat ki KHushi kaise sanbhaalen

hamara nam us ke KHar-o-KHas mein aa gaya hai

lahu mein lau kahan maujud zinda rabte ki

nibhane ko faqat be-ruh rasmen aa gaya hai

ana ke faisle kya marzi-e-pindar kaisi

mera hona na hona us ke bas mein aa gaya hai

utar aae un aankhon mein kuchh aise 'aks 'ali'

ki dil phir se giraft-e-pesh-o-pas mein aa gaya hai