ek ajnabi ki tarah hai ye zindagi mere sath

ik ajnabī kī tarah hai ye zindagī mire saath

jo vaqt kaaT rahī hai hañsī-ḳhushī mire saath

sunā rahā huuñ kisī aur ko kathā apnī

khaḌā huā hai koī aur aadmī mire saath

safar meñ peḌ kā saayā nahīñ milegā mujhe

bas itnā sunte hī dīvār chal paḌī mire saath

vo mujh ko pahle bhī tanhā kahāñ samajhtā thā

phir us ne merī udāsī bhī dekh lī mire saath

sunā hai haal batāne se dard ghaTtā hai

so ek roz charāġhoñ ne baat kī mire saath

alaav jaltā rahā jab talak maiñ chaltā rahā

maiñ ruk gayā to kahānī bhī ruk ga.ī mire saath

ek ajnabi ki tarah hai ye zindagi mere sath

jo waqt kaT rahi hai hansi-KHushi mere sath

suna raha hun kisi aur ko katha apni

khaDa hua hai koi aur aadmi mere sath

safar mein peD ka saya nahin milega mujhe

bas itna sunte hi diwar chal paDi mere sath

wo mujh ko pahle bhi tanha kahan samajhta tha

phir us ne meri udasi bhi dekh li mere sath

suna hai haal batane se dard ghaTta hai

so ek roz charaghon ne baat ki mere sath

alaw jalta raha jab talak main chalta raha

main ruk gaya to kahani bhi ruk gai mere sath