ek be-wafa ko pyar kya hae kya kya

ik be-vafā ko pyaar kyā haa.e kyā kyā

ḳhud dil ko be-qarār kyā haa.e kyā kyā

mā'lūm thā ki 'ahd-e-vafā un kā jhuuT hai

is par bhī e'tibār kyā haa.e kyā kyā

vo dil ki jis pe qīmat-e-kaunain thī nisār

nazr-e-nigāh-e-yār kyā haa.e kyā kyā

ḳhud ham ne faash faash kyā rāz-e-āshiqī

dāman ko taar taar kyā haa.e kyā kiyā

aaheñ bhī baar baar bharīñ un ke hijr meñ

naala bhī baar baar kyā haa.e kyā kyā

miTne kā ġham nahīñ hai bas itnā malāl hī

kyuuñ terā intizār kyā haa.e kyā kyā

ham ne to ġham ko siine se apne lagā liyā

ġham ne hameñ shikār kyā haa.e kyā kyā

sayyād kī razā ye ham aañsū na pī sake

uzr-e-ġham-bahār kyā haa.e kyā kyā

qismat ne aah ham ko ye din bhī dikhā diye

qismat pe e'tibār kyā haa.e kyā kyā

rañgīnī-e-ḳhayāl se kuchh bhī na bach sakā

har shai ko pur-bahār kyā haa.e kyā kyā

dil ne bhulā bhulā ke tirī bevafā.iyāñ

phir ahd ustuvār kyā haa.e kyā kyā

un ke sitam bhī sah ke na un se kyā gila

kyuuñ jabr iḳhtiyār kyā haa.e kyā kyā

kāfir kī chashm-e-nāz pe kyā dil-jigar kā zikr

īmān tak nisār kyā haa.e kyā kyā

kaalī ghaTā ke uThte hī tauba na rah sakī

tauba pe e'tibār kyā haa.e kyā kyā

shām-e-firāq qalb ke dāġhoñ ko gin liyā

tāroñ ko bhī shumār kyā haa.e kyā kyā

'bahzād' kī na qadar koī tum ko ho sakī

tum ne zalīl-o-ḳhvār kyā haa.e kyā kyā

ek be-wafa ko pyar kya hae kya kya

KHud dil ko be-qarar kya hae kya kya

ma'lum tha ki 'ahd-e-wafa un ka jhuT hai

is par bhi e'tibar kya hae kya kya

wo dil ki jis pe qimat-e-kaunain thi nisar

nazr-e-nigah-e-yar kya hae kya kya

KHud hum ne fash fash kya raaz-e-ashiqi

daman ko tar tar kya hae kya kiya

aahen bhi bar bar bharin un ke hijr mein

nala bhi bar bar kya hae kya kya

miTne ka gham nahin hai bas itna malal hi

kyun tera intizar kya hae kya kya

hum ne to gham ko sine se apne laga liya

gham ne hamein shikar kya hae kya kya

sayyaad ki raza ye hum aansu na pi sake

uzr-e-gham-bahaar kya hae kya kya

qismat ne aah hum ko ye din bhi dikha diye

qismat pe e'tibar kya hae kya kya

rangini-e-KHayal se kuchh bhi na bach saka

har shai ko pur-bahaar kya hae kya kya

dil ne bhula bhula ke teri bewafaiyan

phir ahd ustuwar kya hae kya kya

un ke sitam bhi sah ke na un se kya gila

kyun jabr iKHtiyar kya hae kya kya

kafir ki chashm-e-naz pe kya dil-jigar ka zikr

iman tak nisar kya hae kya kya

kali ghaTa ke uThte hi tauba na rah saki

tauba pe e'tibar kya hae kya kya

sham-e-firaq qalb ke daghon ko gin liya

taron ko bhi shumar kya hae kya kya

'bahzad' ki na qadar koi tum ko ho saki

tum ne zalil-o-KHwar kya hae kya kya