ik bevafā ko dard kā darmāñ banā liyā
ham ne to aah kufr ko īmāñ banā liyā
dil kī ḳhalish-pasañdiyāñ haiñ ki allāh kī panāh
tīr-e-nazar ko jān-e-rag-e-jāñ banā liyā
mujh ko ḳhabar nahīñ mire dil ko ḳhabar nahīñ
kis kī nazar ne banda-e-ehsāñ banā liyā
mahsūs kar ke ham ne mohabbat kā har alam
ḳhvāb-e-subuk ko ḳhvāb-e-pareshāñ banā liyā
dast-e-junūñ kī uqda-kushā.ī to dekhiye
dāman ko be-niyāz garebāñ banā liyā
taskīn-e-dil kī ham ne bhī parvāh chhoḌ dī
har mauj-e-ġham ko hāsil-e-tūfāñ banā liyā
jab un kā naam aa gayā ham muztarib hue
aahoñ ko apnī ziist kā unvāñ banā liyā
ham ne to apne dil meñ vo ġham ho ki ho alam
jo koī aa gayā use mehmāñ banā liyā
ā.īna dekhne kī zarūrat na thī koī
apne ko ḳhud hī aap ne hairāñ banā liyā
ik be-vafā pe kar ke tasadduq dil-o-jigar
'bahzād' ham ne ḳhud ko pareshāñ banā liyā
ek bewafa ko dard ka darman bana liya
hum ne to aah kufr ko iman bana liya
dil ki KHalish-pasandiyan hain ki allah ki panah
tir-e-nazar ko jaan-e-rag-e-jaan bana liya
mujh ko KHabar nahin mere dil ko KHabar nahin
kis ki nazar ne banda-e-ehsan bana liya
mahsus kar ke hum ne mohabbat ka har alam
KHwab-e-subuk ko KHwab-e-pareshan bana liya
dast-e-junun ki uqda-kushai to dekhiye
daman ko be-niyaz gareban bana liya
taskin-e-dil ki hum ne bhi parwah chhoD di
har mauj-e-gham ko hasil-e-tufan bana liya
jab un ka nam aa gaya hum muztarib hue
aahon ko apni zist ka unwan bana liya
hum ne to apne dil mein wo gham ho ki ho alam
jo koi aa gaya use mehman bana liya
aaina dekhne ki zarurat na thi koi
apne ko KHud hi aap ne hairan bana liya
ek be-wafa pe kar ke tasadduq dil-o-jigar
'bahzad' hum ne KHud ko pareshan bana liya
Source:
Kaif-o-Suroor (Pg. B-15 E-13)
-
Author:
Behzad Lakhnavi
-
- Publisher: Saqi Book Depot, Delhi
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.