اک دھنک کو دھندھ کرنے کا چلا کیسا چلن

اک دھنک کو دھندھ کرنے کا چلا کیسا چلن

دیکھ تو خود کو ذرا وبگیور ہے پورا بدن

ہے یہ توہین چمن گر ایک دو ہی رنگ ہوں

مختلف رنگوں کے پھولوں سے ہے توقیر چمن

یہ بدن ویسا نہیں ہے وہ بدن ایسا نہیں

ہے ندارد دل ہی جس سے وہ کہو کیسا بدن

دوست ہونا ہے روا محبوب ہونا ناروا

ایک آنکھوں کی ہے ٹھنڈک ایک آنکھوں کی چبھن

پیار سے ہے تم کو نفرت نفرتوں سے پیار ہے

الٹا ہے دستور اندھیرا خود کو کہتا ہے کرن

آگ سینوں میں رہے بس بحث یہ بے کار ہے

سرخ کس کی آگ ہے اور نیلی ہے کس کی اگن

جب اسی نے ہے بنایا یہ جہاں سب کے لیے

لب دعا میں لب پہ رکھو ہو مگن گاؤ بھجن

ایک دوجے کو نہ ماریں یہ برہمن اور شیخ

ایک دوجے پر جو مر جائیں یہ شیخ و برہمن

اب نہیں یوں زندگی سے رنگ چھینے جائیں گے

فخر سے اندردھنش کے ہے بلند اپنا گگن