اک غم نصیب کو ترے غم سے مفر نہیں

اک غم نصیب کو ترے غم سے مفر نہیں

فکر جہاں سے مخلصی ہے بھی مگر نہیں

وہ آشنا نگاہ کم آمیز ہی رہی

اس نامراد دل کی دعا میں اثر نہیں

مژگاں حریف کاوش ناخن نہ ہو سکیں

سوزش تو ہے پہ لذت زخم جگر نہیں

رنج گراں کے بوجھ سے تارے بھی تھک گئے

اس ظلمت فراق کی شاید سحر نہیں

پھر بھی نہ جانے قلب و نظر منتظر ہیں کیوں

مدت سے کوئی سایہ لب بام پر نہیں

واماندگیٔ دشت تحیر ہے اور میں

یہ مختصر حیات مگر مختصر نہیں

سینے کی ظلمتوں میں سلگتا ہے سوز عشق

دھندلی سی ایک یاد کہ نزدیک تر نہیں

صحرائے آرزو میں جرس ہے نہ سنگ میل

دریائے خاک و خوں ہے تری رہ گزر نہیں