ek KHala, ek la-intiha aur main

ik ḳhalā, ek lā-intihā aur maiñ

kitne tanhā haiñ merā ḳhudā aur maiñ

kitne nazdīk aur kis qadar ajnabī!!

mujh meñ mujh sā koī dūsrā aur maiñ

log bhī so ga.e, rog bhī so ga.e

jāgte haiñ mirā rat-jagā aur maiñ

raat aur raat meñ gūñjtī ek baat

ek ḳhauf, ik muñDer, ik diyā aur maiñ

shahr tārāj hai, jabr kā raaj hai

phir bhī sābit haiñ merī anā aur maiñ

tere mausam, tirī guftugū aur tū

merī āñkhoñ meñ ik an-kahā, aur maiñ

ab to is jañg kā faisla ho koī

laḌ rahe haiñ azal se havā aur maiñ

rañg, ḳhushbū, shafaq, chāñdnī, shā.erī

likh rahā thā maiñ, us ne kahā ''aur maiñ!''

us kī baat aur hai, varna ai 'iftiḳhār'

us ko ma.alūm hai, iltijā aur maiñ

ek KHala, ek la-intiha aur main

kitne tanha hain mera KHuda aur main

kitne nazdik aur kis qadar ajnabi!!

mujh mein mujh sa koi dusra aur main

log bhi so gae, rog bhi so gae

jagte hain mera rat-jaga aur main

raat aur raat mein gunjti ek baat

ek KHauf, ek munDer, ek diya aur main

shahr taraj hai, jabr ka raj hai

phir bhi sabit hain meri ana aur main

tere mausam, teri guftugu aur tu

meri aankhon mein ek an-kaha, aur main

ab to is jang ka faisla ho koi

laD rahe hain azal se hawa aur main

rang, KHushbu, shafaq, chandni, shaeri

likh raha tha main, us ne kaha aur main!

us ki baat aur hai, warna ai 'iftiKHar'

us ko malum hai, iltija aur main