ek ranj ba-pairaya-e-zar kyon nahin jata

ik ranj ba-pairāya-e-zar kyoñ nahīñ jaatā

kashkol-e-havas hai to ye bhar kyoñ nahīñ jaatā

vo ā.ina-rū hai to mirā ruup dikhā.e

maiñ us ke muqābil huuñ sañvar kyoñ nahīñ jaatā

dariyā kā talātum to bahut din kī kathā hai

lekin mire andar kā bhañvar kyoñ nahīñ jaatā

kahte ho ki ho usva-e-shabbīr pe qaa.em

darbār meñ kyoñ jaate ho sar kyoñ nahīñ jaatā

jab ruuh se kahte ho ki labbaik husainā

phir jī se yazīdoñ kā ye Dar kyoñ nahīñ jaatā

tum sāhib-e-ma.anā ho to timsāl pe mat jaao

ilzām kabhī aa.ine par kyoñ nahīñ jaatā

lo shaam ga.ī raat hai kābūs hai maiñ huuñ

maiñ sub.h kā bhūlā huuñ to ghar kyoñ nahīñ jaatā

har sang-e-duā mujh ko lagā phuul se baḌh kar

jab itnī duā.eñ haiñ to mar kyoñ nahīñ jaatā

'aḳhtar' tirī guftār-e-fusūñ-kār meñ kyā hai

jo bhī idhar aatā hai udhar kyoñ nahīñ jaatā

ek ranj ba-pairaya-e-zar kyon nahin jata

kashkol-e-hawas hai to ye bhar kyon nahin jata

wo aaina-ru hai to mera rup dikhae

main us ke muqabil hun sanwar kyon nahin jata

dariya ka talatum to bahut din ki katha hai

lekin mere andar ka bhanwar kyon nahin jata

kahte ho ki ho uswa-e-shabbir pe qaem

darbar mein kyon jate ho sar kyon nahin jata

jab ruh se kahte ho ki labbaik husaina

phir ji se yazidon ka ye Dar kyon nahin jata

tum sahib-e-mana ho to timsal pe mat jao

ilzam kabhi aaine par kyon nahin jata

lo sham gai raat hai kabus hai main hun

main subh ka bhula hun to ghar kyon nahin jata

har sang-e-dua mujh ko laga phul se baDh kar

jab itni duaen hain to mar kyon nahin jata

'aKHtar' teri guftar-e-fusun-kar mein kya hai

jo bhi idhar aata hai udhar kyon nahin jata