ek safar par use bhej kar aa gae

ik safar par use bhej kar aa ga.e

ye gumāñ hai ki ham jaise ghar aa ga.e

vo gayā hai to ḳhushiyāñ bhī saarī ga.iiñ

shāḳh-e-dil par ḳhizāñ ke samar aa ga.e

laakh chāho magar phir vo rukte nahīñ

jin parindoñ ke bhī bāl-o-par aa ga.e

ham to raste pe baiThe haiñ ye soch kar

jo ga.e the agar lauT kar aa ga.e

us se mil ke bhī kab us se mil paa.e ham

biich meñ ḳhvāhishoñ ke shajar aa ga.e

us ne us paar apnā baserā kiyā

ham ne dariyā ko chhoḌā idhar aa ga.e

ek dushman se milne ga.e the magar

ik mohabbat ke zer-e-asar aa ga.e

ek safar par use bhej kar aa gae

ye guman hai ki hum jaise ghar aa gae

wo gaya hai to KHushiyan bhi sari gain

shaKH-e-dil par KHizan ke samar aa gae

lakh chaho magar phir wo rukte nahin

jin parindon ke bhi baal-o-par aa gae

hum to raste pe baiThe hain ye soch kar

jo gae the agar lauT kar aa gae

us se mil ke bhi kab us se mil pae hum

bich mein KHwahishon ke shajar aa gae

us ne us par apna basera kiya

hum ne dariya ko chhoDa idhar aa gae

ek dushman se milne gae the magar

ek mohabbat ke zer-e-asar aa gae