ilzam-e-tirgi ke sada us pe aae hain

ilzām-e-tīrgī ke sadā us pe aa.e haiñ

jis ne charāġh apne lahū se jalā.e haiñ

shāyad use hamārī anā kā gumāñ na thā

ham tishnagī paTak ke samundar se aa.e haiñ

ye dilkashī subūt hai ai jān-e-shā.irī

phūloñ ne rang tere laboñ se churā.e haiñ

hairāñ hai vo bhī vus'at-e-parvāz dekh kar

jis ne hamārī fikr pe pahre biThā.e haiñ

tark-e-ta'alluqāt pe vo bhī the ġham-zada

aur ham bhī apnī zaat se jang haar aa.e haiñ

ab naam kyā batā.ūñ ki ġham kis kā hai 'sabā'

āñkheñ mirī zarūr haiñ aañsū parā.e haiñ

ilzam-e-tirgi ke sada us pe aae hain

jis ne charagh apne lahu se jalae hain

shayad use hamari ana ka guman na tha

hum tishnagi paTak ke samundar se aae hain

ye dilkashi subut hai ai jaan-e-shairi

phulon ne rang tere labon se churae hain

hairan hai wo bhi wus'at-e-parwaz dekh kar

jis ne hamari fikr pe pahre biThae hain

tark-e-ta'alluqat pe wo bhi the gham-zada

aur hum bhi apni zat se jang haar aae hain

ab nam kya bataun ki gham kis ka hai 'saba'

aankhen meri zarur hain aansu parae hain