imtihan-e-shauq mein sabit-qadam hota nahin

imtihān-e-shauq meñ sābit-qadam hotā nahīñ

ishq jab tak vāqif-e-ādāb-e-ġham hotā nahīñ

un kī ḳhātir se kabhī ham muskurā uTThe to kyā

muskurā lene se dil kā dard kam hotā nahīñ

jo sitam ham par hai us kī nauiyat kuchh aur hai

varna kis par aaj duniyā meñ sitam hotā nahīñ

tum jahāñ ho bazm bhī hai sham.a bhī parvāna bhī

ham jahāñ hote haiñ ye sāmāñ baham hotā nahīñ

raat bhar hotī haiñ kyā kyā anjuman-ārā.iyāñ

sham.a kā koī sharīk-e-sub.h-e-ġham hotā nahīñ

māñgtā hai ham se saaqī qatre qatre kā hisāb

ġhair se koī hisāb-e-besh-o-kam hotā nahīñ

imtihan-e-shauq mein sabit-qadam hota nahin

ishq jab tak waqif-e-adab-e-gham hota nahin

un ki KHatir se kabhi hum muskura uTThe to kya

muskura lene se dil ka dard kam hota nahin

jo sitam hum par hai us ki nauiyat kuchh aur hai

warna kis par aaj duniya mein sitam hota nahin

tum jahan ho bazm bhi hai shama bhi parwana bhi

hum jahan hote hain ye saman baham hota nahin

raat bhar hoti hain kya kya anjuman-araiyan

shama ka koi sharik-e-subh-e-gham hota nahin

mangta hai hum se saqi qatre qatre ka hisab

ghair se koi hisab-e-besh-o-kam hota nahin