in ne pahle-hi-pahal pi hai sharab aaj ke din

in ne pahle-hī-pahal pī hai sharāb aaj ke din

bolo dil khol kar ai chañg-o-rubāb aaj ke din

ai ajal jā-e-tarahhum hai ki ye āshiq-e-zār

kūcha-e-yār meñ hai pā-e-turāb aaj ke din

yaar bad-mast huā sab pe chhiḌaktā hai sharāb

tah kar ai vā.iz-e-shahr apnī kitāb aaj ke din

roz-e-nau-roz hai milte haiñ sabhī aapas meñ

koī kartā hai kisī par bhī itaab aaj ke din

īd-e-qurbāñ hai butāñ kyuuñ nahīñ sargarm-e-jafā

qatl-e-ushshāq samajhte haiñ savāb aaj ke din

duur daur-e-lab-e-jānāñ hai ajab kyā 'joshish'

mai-kade shahr ke hove jo ḳharāb aaj ke din

in ne pahle-hi-pahal pi hai sharab aaj ke din

bolo dil khol kar ai chang-o-rubab aaj ke din

ai ajal ja-e-tarahhum hai ki ye aashiq-e-zar

kucha-e-yar mein hai pa-e-turab aaj ke din

yar bad-mast hua sab pe chhiDakta hai sharab

tah kar ai waiz-e-shahr apni kitab aaj ke din

roz-e-nau-roz hai milte hain sabhi aapas mein

koi karta hai kisi par bhi itab aaj ke din

id-e-qurban hai butan kyun nahin sargarm-e-jafa

qatl-e-ushshaq samajhte hain sawab aaj ke din

dur daur-e-lab-e-jaanan hai ajab kya 'joshish'

mai-kade shahr ke howe jo KHarab aaj ke din