is but ke har fareb pe qurban se rahe

is but ke har fareb pe qurbān se rahe

ik umr apne miTne ke sāmān se rahe

us jāñ-navāz kūche meñ ham bhī rahe magar

be-dil kabhī rahe kabhī be-jān se rahe

rindān-e-mai-kada haiñ ki tañg aa ke uTh ga.e

yārān-e-mai-kada haiñ ki anjān se rahe

us meñ chaman kā rañg na is meñ chaman kā ruup

ham bū-e-gul se aaj pareshān se rahe

lab sī liye jo ḳhanda-e-yārāñ ke ḳhauf se

barsoñ hamāre siine meñ tūfān se rahe

ye jaan aisī chiiz hai kyā phir bhī ham-nashīñ

ham un pe jaan de ke pashemān se rahe

gulshan meñ josh-e-gul to bagūla haiñ dasht meñ

ahl-e-junūñ jahāñ bhī rahe aan se rahe

is but ke har fareb pe qurban se rahe

ek umr apne miTne ke saman se rahe

us jaan-nawaz kuche mein hum bhi rahe magar

be-dil kabhi rahe kabhi be-jaan se rahe

rindan-e-mai-kada hain ki tang aa ke uTh gae

yaran-e-mai-kada hain ki anjaan se rahe

us mein chaman ka rang na is mein chaman ka rup

hum bu-e-gul se aaj pareshan se rahe

lab si liye jo KHanda-e-yaran ke KHauf se

barson hamare sine mein tufan se rahe

ye jaan aisi chiz hai kya phir bhi ham-nashin

hum un pe jaan de ke pasheman se rahe

gulshan mein josh-e-gul to bagula hain dasht mein

ahl-e-junun jahan bhi rahe aan se rahe