is qadar hawadis hain rasta nahin milta

is qadar havādis haiñ rāsta nahīñ miltā

zindagī ke misroñ kā qāfiya nahīñ miltā

tere bin palaT jā.ūñ ye bhī ab nahīñ mumkin

aur aage baḌhne kā hausla nahīñ miltā

aap apnī sūrat ko ḳhud pe āshkārā kar

shahr kī fasīloñ par aa.ina nahīñ miltā

be-charāġh rastoñ par be-shumār jugnū the

phir bhī ek bulbul ko ghoñsla nahīñ miltā

log milte rahte haiñ aaj bhī tire jaise

tujh sā par kahīñ koī bā-ḳhudā nahīñ miltā

kaisā daur aayā hai ham siyāh-baḳhtoñ ne

sabr kar ke dekhā hai kuchh sila nahīñ miltā

muntazir nigāhoñ se aan baiThe chaukhaT par

mere haq meñ us dar se faisla nahīñ miltā

maiñ to aise logoñ se duur hī bhale jānāñ

jin se merī sochoñ kā zāviya nahīñ miltā

ham sī fāḳhtāoñ kā tum se jañgjūoñ se

aaj bhī to kal jaisā nazriya nahīñ miltā

munsifī kī qīmat hī dastaras se bāhar thī

is liye faqīroñ ko faisla nahīñ miltā

roz be-murād īmāñ ham to lauT aate haiñ

tum se baat karne ko taḳhliya nahīñ miltā

is qadar hawadis hain rasta nahin milta

zindagi ke misron ka qafiya nahin milta

tere bin palaT jaun ye bhi ab nahin mumkin

aur aage baDhne ka hausla nahin milta

aap apni surat ko KHud pe aashkara kar

shahr ki fasilon par aaina nahin milta

be-charagh raston par be-shumar jugnu the

phir bhi ek bulbul ko ghonsla nahin milta

log milte rahte hain aaj bhi tere jaise

tujh sa par kahin koi ba-KHuda nahin milta

kaisa daur aaya hai hum siyah-baKHton ne

sabr kar ke dekha hai kuchh sila nahin milta

muntazir nigahon se aan baiThe chaukhaT par

mere haq mein us dar se faisla nahin milta

main to aise logon se dur hi bhale jaanan

jin se meri sochon ka zawiya nahin milta

hum si faKHtaon ka tum se jangjuon se

aaj bhi to kal jaisa nazriya nahin milta

munsifi ki qimat hi dastaras se bahar thi

is liye faqiron ko faisla nahin milta

roz be-murad iman hum to lauT aate hain

tum se baat karne ko taKHliya nahin milta