is tarah aapne nudrat se nikhaare alfaz

is tarah aap ne nudrat se nikhāre alfāz

aap hī jhuum uThe faḳhr ke maare alfāz

harf-e-raushan se sar-e-bazm ujālā hogā

sho’la-e-nutq se phūTeñ jo sharāre alfāz

kis tarah husn ko tere ye bayāñ kar paate

chāñd chehra hai tirā aur sitāre alfāz

ek din ban ke baheñge ye tumhāre aañsū

ek din yaad karoge ye hamāre alfāz

ab to is saath ko lafzoñ kī zarūrat hī nahīñ

ban ga.e haiñ tirī āñkhoñ ke ishāre alfāz

us kī tausīf ke alfāz nahīñ mil sakte

jis ne insān ke siine pe utāre alfāz

kaaT sahnā bhī baḌī baat huā kartī hai

ye mirī shāḳh-e-hunar aur ye aare alfāz

maiñ tasāvīr banāne meñ magan thā 'sayyad'

ki achānak mire andar se pukāre alfāz

is tarah aap ne nudrat se nikhaare alfaz

aap hi jhum uThe faKHr ke mare alfaz

harf-e-raushan se sar-e-bazm ujala hoga

sho’la-e-nutq se phuTen jo sharare alfaz

kis tarah husn ko tere ye bayan kar pate

chand chehra hai tera aur sitare alfaz

ek din ban ke bahenge ye tumhaare aansu

ek din yaad karoge ye hamare alfaz

ab to is sath ko lafzon ki zarurat hi nahin

ban gae hain teri aankhon ke ishaare alfaz

us ki tausif ke alfaz nahin mil sakte

jis ne insan ke sine pe utare alfaz

kaT sahna bhi baDi baat hua karti hai

ye meri shaKH-e-hunar aur ye aare alfaz

main tasawir banane mein magan tha 'sayyad'

ki achanak mere andar se pukare alfaz