is tarah dhup mein dastar na DhunDe koi

is tarah dhuup meñ dastār na DhūñDe koī

jeb ḳhālī ho to bāzār na DhūñDe koī

ham se dīvānoñ kī ta.adād bahut kam hai yahāñ

har galī kūche meñ fankār na DhūñDe koī

ham to āvāra musāfir haiñ phirā karte haiñ

ham ko ik shahr meñ har baar na DhūñDe koī

hādse shahr kā dastūr bane jaate haiñ

ab yahāñ sāya-e-dīvār na DhūñDe koī

mujh ko ajdād se bas maiñ hī milā virse meñ

mujh se milnā ho to ghar-bār na DhūñDe koī

mujh ko us paar sadā de ke sabhī lauT aa.e

maiñ yahīñ huuñ magar is paar na DhūñDe koī

ye parinda to nigāhoñ meñ chhupā baiThā hai

lab-e-inkār pe iqrār na DhūñDe koī

aise tūfān meñ tinkā bhī ġhanīmat hai 'shakīl'

naav mil jaa.e to patvār na DhūñDe koī

is tarah dhup mein dastar na DhunDe koi

jeb KHali ho to bazar na DhunDe koi

hum se diwanon ki tadad bahut kam hai yahan

har gali kuche mein fankar na DhunDe koi

hum to aawara musafir hain phira karte hain

hum ko ek shahr mein har bar na DhunDe koi

hadse shahr ka dastur bane jate hain

ab yahan saya-e-diwar na DhunDe koi

mujh ko ajdad se bas main hi mila wirse mein

mujh se milna ho to ghar-bar na DhunDe koi

mujh ko us par sada de ke sabhi lauT aae

main yahin hun magar is par na DhunDe koi

ye parinda to nigahon mein chhupa baiTha hai

lab-e-inkar pe iqrar na DhunDe koi

aise tufan mein tinka bhi ghanimat hai 'shakil'

naw mil jae to patwar na DhunDe koi