is tarah ji raha hun tere aastan se dur

is tarah jī rahā huuñ tire āstāñ se duur

jaise ho andalīb gul-o-gulsitāñ se duur

kis tarah jī rahe haiñ qafas meñ na pochhiye

dil āshiyāna meñ hai nazar āshiyāñ se duur

sho'loñ se khelne kā salīqa na ho jinheñ

vo āshiyāñ banā.eñ kahīñ gulsitāñ se duur

gum-karda-rāh ban ga.e jab mīr-e-kārvāñ

jo rāhbar the rahne lage kārvāñ se duur

rahtā zamāna terī haqīqat se be-ḳhabar

rahtī mirī jabīñ jo tire āstāñ se duur

ai ham-nashīñ hazār kushāda zamīñ sahī

jaa.eñ bhī ham to jaa.eñ kahāñ āsmāñ se duur

ik mehrbāñ mile the bahut din kī baat hai

rahne lagā huuñ jab se har ik mehrbāñ se duur

ḳhāshāk-e-āshiyāñ meñ bhī haiñ bijliyāñ nihāñ

ai barq-e-be-qarār zarā āshiyāñ se duur

phūloñ ko haath bhī na lagā paa.e 'umr bhar

ham gulsitāñ meñ rah ke rahe gulsitāñ se duur

'tālib' unhīñ ke dam se hai tauqīr-e-zindagī

rakhte haiñ apne sar ko jo har āstāñ se duur

is tarah ji raha hun tere aastan se dur

jaise ho andalib gul-o-gulsitan se dur

kis tarah ji rahe hain qafas mein na pochhiye

dil aashiyana mein hai nazar aashiyan se dur

sho'lon se khelne ka saliqa na ho jinhen

wo aashiyan banaen kahin gulsitan se dur

gum-karda-rah ban gae jab mir-e-karwan

jo rahbar the rahne lage karwan se dur

rahta zamana teri haqiqat se be-KHabar

rahti meri jabin jo tere aastan se dur

ai ham-nashin hazar kushada zamin sahi

jaen bhi hum to jaen kahan aasman se dur

ek mehrban mile the bahut din ki baat hai

rahne laga hun jab se har ek mehrban se dur

KHashak-e-ashiyan mein bhi hain bijliyan nihan

ai barq-e-be-qarar zara aashiyan se dur

phulon ko hath bhi na laga pae 'umr bhar

hum gulsitan mein rah ke rahe gulsitan se dur

'talib' unhin ke dam se hai tauqir-e-zindagi

rakhte hain apne sar ko jo har aastan se dur