ishq kab apne maqasid ka nigahban na hua

ishq kab apne maqāsid kā nigahbāñ na huā

kaun sā ġham hai jo āḳhir ġham-e-jānāñ na huā

laakh chāhā magar afsos ki aañsū na thame

zabt-e-ġham mujh se ba-qadr-e-ġham pinhāñ na huā

terī ishrat hai ki gardūñ ke dabā.e na dabī

merā ġham hai ki hañsī meñ bhī numāyāñ na huā

ġham-e-duniyā ġham-e-uqbā ġham-e-hastī ġham-e-maut

koī ġham bhī to harīf-e-ġham-e-jānāñ na huā

zarre zarre se ye elān-e-pareshānī hai

mutma.in ḳhaak vo hogā jo pareshāñ na huā

jis ke dāman se hai vābasta mirā zauq-e-hayāt

vo bhī kāfir mire me.aar kā insāñ na huā

maiñ rahā garche har ehsās pe masrūf-e-sujūd

koī sajda bhī tirī shaan ke shāyāñ na huā

barf-zār-zor-o-daulat kā har afsurda zamīr

zamzamoñ se mire kab sho.ala-ba-dāmāñ na huā

barq nākām mah-o-mehr kavākib māyūs

na huā mere nasheman meñ charāġhāñ na huā

mere taḳhlīq-e-adab meñ hai qasīda mādūm

mujh se 'ehsān' kisī vaqt ye isyāñ na huā

ishq kab apne maqasid ka nigahban na hua

kaun sa gham hai jo aaKHir gham-e-jaanan na hua

lakh chaha magar afsos ki aansu na thame

zabt-e-gham mujh se ba-qadr-e-gham pinhan na hua

teri ishrat hai ki gardun ke dabae na dabi

mera gham hai ki hansi mein bhi numayan na hua

gham-e-duniya gham-e-uqba gham-e-hasti gham-e-maut

koi gham bhi to harif-e-gham-e-jaanan na hua

zarre zarre se ye elan-e-pareshani hai

mutmain KHak wo hoga jo pareshan na hua

jis ke daman se hai wabasta mera zauq-e-hayat

wo bhi kafir mere mear ka insan na hua

main raha garche har ehsas pe masruf-e-sujud

koi sajda bhi teri shan ke shayan na hua

barf-zar-zor-o-daulat ka har afsurda zamir

zamzamon se mere kab shoala-ba-daman na hua

barq nakaam mah-o-mehr kawakib mayus

na hua mere nasheman mein charaghan na hua

mere taKHliq-e-adab mein hai qasida madum

mujh se 'ehsan' kisi waqt ye isyan na hua