عشق میں دریا کیا ہیں سمندر پار کیے جا سکتے ہیں

عشق میں دریا کیا ہیں سمندر پار کیے جا سکتے ہیں

جوش جنوں سے کوہ گراں مسمار کیے جا سکتے ہیں

دل سے نکلی آہ سے اکثر عرش بریں ہل جاتا ہے

ابر دعا سے صحرا بھی گلزار کیے جا سکتے ہیں

باغ جناں کوثر کا کنارہ یا کہ پہاڑی طوبیٰ کی

خواب کی آنکھوں سے کیا کیا دیدار کیے جا سکتے ہیں

توڑ کے جن کو ہوتا ہو احساس زیاں ہر بار مگر

ایسے وعدے ایک نہیں سو بار کیے جا سکتے ہیں

ایک زباں کتنے رشتوں کو بیگانہ کر دیتی ہے

اور اسی سے غیر بھی رشتے دار کیے جا سکتے ہیں

آئینوں میں چہروں کی سچائی دکھائی دیتی ہے

کیا چہرے بھی ایسے ہی زنگار کیے جا سکتے ہیں

بعد کے ہر آنے والے کو مشکل پھر درپیش نہ ہو

منزل تک آتے رستے ہموار کیے جا سکتے ہیں