ishq mein gham ke siwa koi KHushi dekhi nahin

ishq meñ ġham ke sivā koī ḳhushī dekhī nahīñ

zindagī shāyān-e-lutf-e-zindagī dekhī nahīñ

un ḳhizāñ-sāmāñ bahāroñ ko bahāreñ kyuuñ kahūñ

kyā kabhī maiñ ne chaman kī dilkashī dekhī nahīñ

uf vo āñkheñ marte dam tak jo rahī haiñ ashk-bār

haa.e vo lab umr bhar jin par hañsī dekhī nahīñ

tak rahā huuñ naza.a meñ yuuñ un kī sūrat baar baar

zindagī meñ jaise ye sūrat kabhī dekhī nahīñ

vo Dare mahshar-ba-dāmāñ talḳhi-e-māhaul se

jis ne un nazroñ kī shān-e-barhamī dekhī nahīñ

baḌh gayā hai kis qadar tārīkiyoñ kā silsila

bā-vujūd-e-sub.h-e-raushan raushnī dekhī nahīñ

ishq mein gham ke siwa koi KHushi dekhi nahin

zindagi shayan-e-lutf-e-zindagi dekhi nahin

un KHizan-saman bahaaron ko bahaaren kyun kahun

kya kabhi main ne chaman ki dilkashi dekhi nahin

uf wo aankhen marte dam tak jo rahi hain ashk-bar

hae wo lab umr bhar jin par hansi dekhi nahin

tak raha hun naza mein yun un ki surat bar bar

zindagi mein jaise ye surat kabhi dekhi nahin

wo Dare mahshar-ba-daman talKHi-e-mahaul se

jis ne un nazron ki shan-e-barhami dekhi nahin

baDh gaya hai kis qadar tarikiyon ka silsila

ba-wujud-e-subh-e-raushan raushni dekhi nahin