ishq mein humne amanat mein KHayanat nahin ki

'ishq meñ ham ne amānat meñ ḳhayānat nahīñ kī

dard bechā nahīñ jazboñ kī tijārat nahīñ kī

pyaar duniyā se kiyā ham ne usī kī ḳhātir

aur usī ke liye duniyā se mohabbat nahīñ kī

ham ne DhūñDā nahīñ marne kā bahāna koī

zinda rahne kī bhī paidā koī sūrat nahīñ kī

apne haq meñ use ḳhush-fahmī bahut hai varna

ham ne mahsūs kabhī us kī zarūrat nahīñ kī

ham ko mā'lūm thā kuufe ke safar kā anjām

haq kī chāhat meñ magar tark masāfat nahīñ kī

'ishq kāmil ho to duurī bhī huzūrī hai miyāñ

hijr kī us ke kabhī ham ne shikāyat nahīñ kī

jism-tā-jism faqat chand qadam the 'najmī'

tum bhī kyā ho ki tai itnī sī masāfat nahīñ kī

'ishq mein hum ne amanat mein KHayanat nahin ki

dard becha nahin jazbon ki tijarat nahin ki

pyar duniya se kiya hum ne usi ki KHatir

aur usi ke liye duniya se mohabbat nahin ki

hum ne DhunDa nahin marne ka bahana koi

zinda rahne ki bhi paida koi surat nahin ki

apne haq mein use KHush-fahmi bahut hai warna

hum ne mahsus kabhi us ki zarurat nahin ki

hum ko ma'lum tha kufe ke safar ka anjam

haq ki chahat mein magar tark masafat nahin ki

'ishq kaamil ho to duri bhi huzuri hai miyan

hijr ki us ke kabhi hum ne shikayat nahin ki

jism-ta-jism faqat chand qadam the 'najmi'

tum bhi kya ho ki tai itni si masafat nahin ki