ishq mein sunte to the lutf-e-jawani aur hai

'ishq meñ sunte to the lutf-e-javānī aur hai

jo magar guzrī hai ham par vo kahānī aur hai

us ne māthe par rakhe lab aur hue raushan nasīb

sab matā-e-dahr meñ us kī nishānī aur hai

lafz-e-kun se ek duniyā ḳhalq karnā thā kamāl

kun ke aage jo huā us kī kahānī aur hai

ek zaḳhm-e-dil se phūTe muḳhtalif rangoñ ke dukh

hai alag ḳhūn-e-jigar āñkhoñ kā paanī aur hai

lagte hoñge pur-kashish arz-o-samā milte hue

niile kurte par tire ye shaal dhānī aur hai

ek se dil haiñ judā lekin dhaḌakne ke sabab

rā.egāñ to sab haiñ lekin rā.egānī aur hai

lamha lamha khīñch kar barsoñ chalāte ho jo tum

ye hai qaid-e-ba-mashaqqat zindagānī aur hai

tum parinde dekhne vaale tumheñ kyā hai ḳhabar

hai alag parvāz aur naql-e-makānī aur hai

ho visāl-e-yār ab ho sūrat-e-iz.hār ab

'ishq hogā jāvedāñ ye jism-e-fānī aur hai

'ishq mein sunte to the lutf-e-jawani aur hai

jo magar guzri hai hum par wo kahani aur hai

us ne mathe par rakhe lab aur hue raushan nasib

sab mata-e-dahr mein us ki nishani aur hai

lafz-e-kun se ek duniya KHalq karna tha kamal

kun ke aage jo hua us ki kahani aur hai

ek zaKHm-e-dil se phuTe muKHtalif rangon ke dukh

hai alag KHun-e-jigar aankhon ka pani aur hai

lagte honge pur-kashish arz-o-sama milte hue

nile kurte par tere ye shaal dhani aur hai

ek se dil hain juda lekin dhaDakne ke sabab

raegan to sab hain lekin raegani aur hai

lamha lamha khinch kar barson chalate ho jo tum

ye hai qaid-e-ba-mashaqqat zindagani aur hai

tum parinde dekhne wale tumhein kya hai KHabar

hai alag parwaz aur naql-e-makani aur hai

ho visal-e-yar ab ho surat-e-izhaar ab

'ishq hoga jawedan ye jism-e-fani aur hai